1۔ مُجھ پر رحم کر اَے خُدا! مُجھ پر رحم کر
کیونکہ میری جان تیری پناہ لیتی ہے۔
مَیں تیرے پروں کے سایہ میں پناہ لُوں گا
جب تک یہ آفتیں گُزر نہ جائیں۔
2۔ مَیں خُدا تعالیٰ سے فریاد کرُوں گا۔
خُدا سے جو میرے لِئے سب کُچھ کرتا ہے۔
3۔ وہ میری نجات کے لِئے آسمان سے بھیجے گا۔
جب وہ جو مُجھے نِگلنا چاہتا ہے ملامت کرتا ہو۔ (سِلاہ)
خُدا اپنی شفقت اور سچّائی کو بھیجے گا۔
4۔ میری جان بَبروں کے درمیان ہے۔
مَیں آتش مِزاج لوگوں میں پڑا ہُوں۔
یعنی اَیسے لوگوں میں جِن کے دانت برچِھیاں اور تِیر ہیں۔
جِن کی زُبان تیز تلوار ہے۔
5۔ اَے خُدا تُو آسمان پر سرفراز ہو!
تیرا جلال ساری زمِین پر ہو!
6۔ اُنہوں نے میرے پاؤں کے لِئے جال لگایا ہے۔
میری جان عاجِز آ گئی۔
اُنہوں نے میرے آگے گڑھا کھودا۔
وہ خُود اُس میں گِر پڑے۔ (سِلاہ)
7۔ میرا دِل قائِم ہے۔ اَے خُدا! میرا دِل قائِم ہے۔
مَیں گاؤُں گا بلکہ مَیں مدح سرائی کرُوں گا۔
8۔ اَے میری شَوکت! بیدار ہو۔ اَے بربط اور سِتار جا گو۔
مَیں خُود صُبح سویرے جاگ اُٹھوں گا۔
9۔ اَے خُداوند! مَیں لوگوں میں تیرا شُکر کرُوں گا۔
مَیں اُمّتوں میں تیری مدح سرائی کرُوں گا۔
10۔ کیونکہ تیری شفقت آسمان کے
اور تیری سچّائی افلاک کے برابر بُلند ہے۔
11۔ اَے خُدا تُو آسمان پر سرفراز ہو!
تیرا جلال ساری زمِین پر ہو!
آمین!
